金枝慾孽

好正0既一套劇
我真係未試過對一部TVB劇咁著迷
瘋狂到想擁有套劇0既DVD
可能真係受到之前0既新聞影響
所以想睇0既興趣大0左
再加上呢套唔係乜0野老老土土0既劇
唔會一早估到晒d劇情
所以想再睇過
同埋d演員我覺得都幾OK
原來之前講係話蔡少芬做
好彩唔係咋

其實如妃無我想像中咁奸
基本上我唔覺得佢奸
祗係身不由己
到0左咁高0既位置
祗係under個皇帝同皇后
下面有N個人想謀佢個位
佢唔咁做根本生存唔到
成個皇宮得個皇上唔會同佢成日鬥(不過都要做好多0野令自己得寵)
之前有BB但小產(仲要俾人害)
跟住有BB又夭折
又唔可以同鍾意0既人離開皇宮
要一直同個奸皇后鬥
我覺得佢真係好慘囉
其實如果係我
我一早揀同孔武走啦
其他事走0左至算
孔武都好慘
經歷0左咁多0野安茜先應承同佢一齊
但未開心完又失望喇
最後雖然可以同安茜一齊離開皇宮
但安茜會死咧
真係又係好慘囉
如果我係安茜
我已經一早同孔武走0左喇
向皇后報仇簡直係唔可能

LONG TIME NO SEE

成三個幾月無寫日記喇
9月10月因為唔得閒
自己一個人0係屋企
乜都要自己做
所以差d連上網都無時間
更可況寫日記呢
不過0果兩個月真係好鬼free
做乜都無人理
所以每個weekend都成3-4點先訓
本來諗住自己試0下煮0野食0既
不過上網睇見樣樣都要做好多預備功夫
又要買
又要整
跟住先至煮
咁麻煩
所以都係打消0左個念頭
最後個禮拜我都係晚晚食麵包
又平又唔洗做功夫

11月祗係個人懶
無乜特別理由
有部新MP3
所以順便換0左部陳年老爺機
之前0果部乜都無
又無USB
又慢
呢次連keyboard呀mouse呀都換鬼晒
因為都夠期要換喇
個電腦so far都OK
無乜特別大問題
我將0係CD上面d歌轉晒做MP3
咁就真係方便好多
不過個MP3比較徙電
一粒AAA電聽0下就用晒
好唔化算囉

去完旅行囉~~

一個星期0既旅行話咁快就完0左喇
真係好唔捨得呀
最開心0既係成個禮拜都好好天
好好陽光
最衰我又無帶短袖衫
去到Quebec時著住件長袖衫鬼死咁熱
同埋日日都咁好陽光
我又無帶防晒(唉﹐真失策)
搞到宜家塊面黑晒0添
我最鐘意0既係PEI王子島
個環境好正
可能配合住個超級好天氣
所以更加覺得呢個地方舒服
聽聞0果度個冬天凍到嚇死人
如果要我0係0果度住0既話我一定會凍死同悶死
其實Halifax都唔錯0架
比我0既感覺好歐洲feel
完全唔覺得係0係加拿大囉
我初時以為0果度會同多倫多一樣係好美國化0添
最搞笑0既係0果度好多人係講法文0既
同佢地講英文都唔係好掂
令我有d衝動想去學法文0添

雖然係巴士團
覺得成日坐0係車度好累
但係有得玩我就覺得無乜所謂喇

8月23日至29日海洋省五省十巿七日遊行程

2004年8月23日 星期一
- KINGSTON 京士頓
- 監獄
- 皇后大學
- 火車頭
- 午餐 - CHINESE BUFFET
- OTTAWA 渥太華
- 國會山莊
- 總理府
- 皇家鑄幣廠 - 捧金磚, 換銀仔
- 香檳瀑布﹐吊橋
- MONTREAL 滿地可
- NOTRE DAME 聖母院
- CITY TOUR
- 晚餐 - 滿地可唐人街 - 紅寶石
- 酒店 - SHERETON

2004年8月24日 星期二
- 早餐 - SET BREAKFAST - 煎蛋﹐煙肉﹐多士﹐奶茶
- NEW BRUNSWICK 紐賓士域省
- 午餐 - 麥當奴 - 魚柳包
- CAMBPELLTON - 三文魚像
- MIRAMICHI - 酒店 - WELLCOME DRINK
- 晚餐 - WONG'S - 雲吞(6隻)﹐蝦芙蓉蛋﹐西蘭花牛肉

2004年8月25日 星期三
- 早餐 - 酒店 - 多士﹐YOGURT﹐橙汁
- SHEDIAC - 龍蝦像
- 午餐 - DELUXE - LOBSTER ROLL﹐ SEAFOOD PLATTERS
- NOVA SCOTIA 斯高沙省
- PEGGY'S COVE 燈塔郵局
- HALIFAX 哈利法斯
- DARTMOUTH - MARINE MUSEUM (有TITANIC) - BLUENOSE II - 雪糕 (COW)
- 酒店
- 晚餐 - CHINESE RESTAURANT - 白切雞﹐石頭魚﹐HAKE 魚
- CITADEL - PRINCE EDWARD 鐘樓城堡
- 哈利法斯 DOWNTOWN

2004年8月26日 星期四
- 早餐 - 自備麵包
- 出海觀鯨
- 坐船去PEI 愛德華王子島
- 午餐 - 船上 - PIZZA﹐朱古力奶
- PEI 愛德華王子島
- CITY HALL王子島省會大樓
- ANTIQUE SHOP
- 睇短劇
- ANNE OF GREEN GABLES
- 海灘
- 酒店
- 晚餐 - 酒店 - 龍蝦餐

2004年8月27日 星期五
- 早餐 - 酒店 - BUFFET - 多士﹐炒蛋﹐橙汁﹐咖啡
- 最長垮海大橋去紐賓士域省
- 花瓶石公園
- 午餐 - CHINESE BUFFET - 美心甜品師傅
- 倒流瀑布
- ST. JOHN 聖約翰市
- CITY TOUR
- MARKET SQUARE
- 晚餐 - CHINESE RESTAURANT - 豉油雞﹐魚

2004年8月28日 星期六
- 早餐 - 麵包(之前一日在MARKET SQUARE 買的)
- FREDERICTON 法得烈頓市- CITY HALL
- HARTLAND 有蓋橋
- GRAND FALLS
- 午餐 - 麥當奴 - FAJITA
- QUEBEC CITY 魁北克市
- CITY TOUR
- 畫卡通畫
- 買鵝肝
- 晚餐 - BURGER KING

2004年8月29日 星期日
- 早餐 - 薯條(之前一日在麥當奴買的)
- BRUNCH - CHINESE BUFFET
- THOUSAND ISLAND 千島
- 回多倫多

複雜0既人際關係

好多事原來唔係我想像中咁簡單
眼見到好似好好0既關係其實原來中間有好多或者有好大問題
祗不過人0地唔講又或者係我睇唔到0者

人同人0既關係不斷0係度變
預計唔到
又估唔到
亦都睇唔到
今日0係一齊0既
聽日可能已經分開0左
所以就算知道對方有partner
如果唔係有對方0既最update生活狀況(即係對方仲同呢個partner一齊)
就千祈千祈千祈唔好問或者講d 0野係會involve到對方個partner
如果唔係就大煲喇(今年我已經撞過兩次板﹐今日差d又撞多一次)。

其實
今日同呢個人0既關係好似好好
但係可能聽日個關係會有180度轉變
人同人0既關係好似好脆弱咁
有少少風浪或者誤會就會散
尤其是0係呢個年代
唔夾呀﹖咪分開囉﹐唔好見囉。

誤會0既出現可能祗係好簡單0既一句說話
我講呢句說話祗不過係出於某種好意
又或者祗係一個無乜傷害性0既意思
甚至乎係無乜特別意思
但係對方接收到0既可以係原全不同0既meaning
甚至係一個同我所想0既係相反
又或者係一個我諗都無諗過0既意思
有時我諗
係咪我0既表達能力有問題呢﹖
語氣有問題﹖
用詞有問題﹖
但係有時我覺得我真係無乜問題呀
咁係咪即係每一個人0既interpretation都唔同呢﹖
咁就弊啦
咁即係每講一句說話都要去估對方0既反應﹖
你話如果係熟0既
又或者係父母就話易估0者(其實呢個我係經常會做0既)

其實今日我同我一齊學日文0既朋友學到好多0野
知道0左好多0野
亦都俾我諗到好多0野

三分鐘熱度

我係名符其實0既三分鐘熱度0既人
好容易鍾意一樣0野
但係又好快就會厭
0係鍾意0既時候會成日都搵呢方面0既資料
但係厭左之後就想我再睇都幾難
所以有時我如果鍾意一樣0野鍾意0左好耐
咁我就真係好鍾意呢樣0野喇
今日玩0左個心理測驗
話我喜惡分明
都好0岩呀
如果我鍾意一樣0野
我就唔會咁易會對呢樣0野討厭0既
極其量都係變0左無乜感覺0者
同樣地
如果一樣0野我係好憎好討厭0既話
又好難會令我變為好鍾意
又或者唔討厭0番

唉﹐今日部腦慢到嘔電呀
激氣呀﹗

8月啦﹗

話咁快8月已經0黎到喇
好快個夏天就完喇
唉﹐又要捱凍囉(雖然宜家講係早0左d)

終於有機會去0下旅行喇
有成兩年無去過旅行喇
自己諗返起都覺得有d不可思議
最初出0黎做0野0既時候覺得做成年0野唔放假去旅行係會死0既
點知自己做0下做0下又可以無去過任何地方
祗係係咁意拎0左幾日聖誕假
自己居然做0左一d連自己都唔相信會做0既0野

0岩0岩過0左0既呢個禮拜雖然祗係返4日工
但係就仲辛苦過平時返5日
都係自己唔夠訓0既關係
連續兩晚都成4點幾至訓
雖然可以訓到12點
但係就好似仲唔夠咁囉
其實星期六0果晚係整理番我以前download過0既SMAP wmv files
希望將d無咁好笑又或者唔明點解0既skits洗晒佢
留返d真係好笑又或者係5個人一齊做0既skits
就咁就搞0左成幾個鐘喇
仲以為可以好快搞掂0架嘛

近排玩好多電腦games
主要係逃離房間呀
或者係d要搵出口呀
搵路走0既遊戲
都幾好玩0架
至少可以用0下個腦先啦
如果贏0左仲好鬼開心0添呀

金雞 1&2

上個Weekend連續睇完金雞1同埋2
好香港0既戲
我意思即係話一定要係香港人先至會有共鳴同埋會感動囉
雖然係笑片
但係有d位都真係會睇到眼濕濕0架
好似講吳君如知道黃日華死0左0果段啦
同埋講吳君如知道張學友係為0左將d錢轉俾佢先至同佢結婚又即刻離婚
而張學友就知道吳君如之前有0左0既BB係佢 0既
我真係睇到想喊0架
仲有就係我幾鍾意胡軍0果段
幾有戲味
我都幾鍾意呢類戲0架
係叫做笑片
但係會有d感動位
咁就最正喇

我覺得第一集好睇d
第二集雖然都好好笑
但係硬係覺得無第一集咁好睇囉

講返七月一號long weekend

今日上網好慢
再加上d搵工網站無乜點update
所以有d時間寫0下個日記
未開呢個日記之前好似有好多0野想記低
但係開0左之後就發覺好似無乜0野好寫
又或者咁講
我其實祗係三分鐘熱度
不過我都會盡量寫落去0既

上個禮拜long weekend
禮拜四七月一號國慶放假
我就告埋禮拜五
變成放四日
禮拜四0果日去0左打保齡同唱K
好耐無打保齡喇
我諗都有兩年無打喇
生晒鏽喇
落坑多過乜
個分低到無人有
不過都係志在參與0者
跟住去Echo唱K
個場真係好唔掂
隔音好差
不過就貪呢度夠平
8蚊唱成5個鐘仲有0野飲
去邊度搵丫

二號去0左Niagara個新賭場
我祗係覺得好大囉
同埋因為新
所以無乜煙味
但係就好少人
可能0果陣仲早0卦
呢個新賭場對開可以望到個瀑布成個全景
都好正喎
唔比0係下面望遜色0番
各有千秋啦
0係呢度望仲可以望埋d水0係好遠0果度0黎
同埋望埋美國0果邊
但係呢d景0係下面就望唔到囉

日記→雙週記﹖

呢個日記開0左三個幾月
越來越似係雙週記喇
其實中間有d事想寫低
但係真係好無時間(唉﹐要搵工係咁0架喇)
所以趁宜家有d時間(兼夾我想鬆弛0下)
就寫d啦
如果唔係我實會唔記得0架

上個禮拜三(六月十六號)
下晝兩點幾仲有幾分鐘三點啦
我0係公司做緊0野0既時候
忽然間聽到“世界唯一的花”中間0果段音樂
我最初聽唔得清楚
隱隱約約咁啦
點知跟住就聽到唱第二段0勒
因為個收音機好細聲
我真係聽唔得清楚係咪SMAP唱0既
不過我祗係聽到d歌詞(如果唔係我又點知係第二段呢﹖d歌詞都聽得幾清楚0架)
但係分唔到把聲係邊個囉
我後尾返屋企諗住上網聽返啦(我知道係CBC)
點知又無得聽返喎
好奇怪點解CBC會無情白事播隻日文歌呢?

上個禮拜日(二十號)去0左Wonderland
0果日天氣幾好0架
有太陽但又唔係超熱
都幾OK 0架
其實就同其他玩機動遊戲0既地方無咩大分別
都係0果d咁0既0野囉
老實講
我有好多都無玩到
如果我係咁大膽0既話
我就一早去過呢度啦
唔駛等到今時今日啦
去完去Yonge同Finch 0果頭食日本0野
都幾好食0架
d魚生都好新鮮
又有白tuna
好正0架

呢幾日歐洲國家杯八強對打
前兩日(二十四號)係英格蘭對葡萄牙
我咁0岩趕得切返屋企睇射十二碼(係現場啊)
英格蘭第一球係碧咸射
唔知佢做咩射到好唔“拉更”囉
後尾睇返新聞重播呢一球我都忍唔住笑0左出0黎
唔係話係好negative 0既嘲笑囉
而係“唉﹐射到咁”
係一面搖頭一面覺得好可惜0既笑囉
咁失禮
堂堂一個咁有經驗又係隊長0既球員竟然射到咁
真係想唔笑都忍唔到囉

我頭先至醒起下個禮拜祗係返三日工咋﹐YEAH﹗﹗
本來星期五要返0架
不過我見得0果一日
又係禮拜五
咪又放埋佢囉
0果日都唔會有咩心情做0野0架啦
好似好耐無放過假喇
好想去第二度玩呀

呢期亞Sam好紅呀
其實我有d奇怪
雖然話就話好耐之後再出返0黎唱0者
都唔駛咁誇張0卦
撲飛撲得咁犀利
買到飛就開心到執到金咁
不過我尋晚都聽返0下佢d歌
d歌詞就真係幾啜核搞0野0既

重看長假

想唔認老都唔得喇
我0既身體機能話俾我知我已經唔係後生
有好多我無諗過0既0野都出現0左
又唔捱得夜
我宜家正極力令到雙眼唔好有紋
都唔一定係眼0既
祗要塊面唔好有皺紋就得0勒
我知呢d遲早會出現
但遲總好過早丫
其他地方就話可以遮遮掩掩0者
塊面就無計啦
唔通要做懞面超人咩

呢兩日有個新體驗
如果一d自己一路都做開0既行為動作同埋想法
如無必要0既
就最好唔好隨便改變
如果唔係實“賴0野”

呢排開始睇返一d以前買落0既小說
其實已經睇過好多次0架喇
不過就真係好耐無睇
所以都無咩熟口熟面0既感覺
睇返Long Vacation個小說版
睇0既時候又一路聽返呢套劇0既配樂
令我好懷念呀
所以呢個weekend就摷返餅帶0黎睇
雖然係96年春天拍
都成8年喇
不過一d都無比我好舊好老土0既感覺
可能套劇無一d新科技
例如手機呀﹐電腦呀﹐呢d外型會變得好快0既0野
所以感覺上唔似已經係拍0左咁耐
同埋著d衫同埋d髮型化妝都仲可以睇得0下
因為d款同style都好大路0下
其實我係跳0黎睇
今次集中0係前半part
因為以前我好多時都係由中間近尾開始睇
個感覺依然係好正
不愧係經典
可能我已經到同葉山南差唔多0既年紀
更加能夠理解同體會到佢0既心態

我越來越愛呢套劇喇﹗﹗﹗﹗﹗

生老病死

剛剛知道列根死0左
唔知點解
有少少鼻酸0既感覺
可能佢在任0既時候我仲讀緊小學
而小學係其中一個我過得比較開心0既時期
所以有d親切感啦
0係睇到呢段新聞0既時候
聽緊梅姐0既歌
兩個都不在世喇
我突然間有種感覺
就係我不斷咁成長
不斷咁日復一日咁過日子
另一方面睇
我其實亦都係一日一日咁接近死亡0既日子
當然我唔知自己有幾多歲命
我亦都唔係咁想知
但係毫無疑問
我會離“老”﹑“病”﹑“死”越來越近
我知道呢個係每個人都會經過0既階段
我都會有結束生命0既一日
但“死”之前會唔會有“老”同埋“病”
(即係老人家﹐我知我呢個年紀0係好多人心目中都已經算做係老)
就好難講喇
或者我無幾耐之後會訓訓0下覺死鬼0左呢
who knows﹖
我覺得做人其實真係好複雜
好難`好煩0既事
如果好似d動物咁
祗係弱肉強食
生命0既過程會簡單好多
我覺得做人其實無乜意義
搞咁多0野出0黎
最終咪又係要死
個個都一樣0架0勒
無例外0既
一個人一生出0黎
跟住讀書﹐畢業﹐做0野
跟住做到無得做
又或者做唔到0既時候
就退休
跟住真係好快就要結束生命0架喇喎
好似點都走唔出呢個框框囉

Air Supply

尋晚抽起條筋聽返Air Supply隻精選
係成20年前0既精選
雖然隻隻都係舊歌
但係每一隻都係真係好鬼死好聽0既舊歌
佢地又唱得鬼咁好喎
d音低又唱到
好高0既又唱到喎
最摞命0既就係d高音唔係d咩假音囉
老實講
0係佢地面前
連好似張學友呢d唱得咁好0既歌手都真係會比下去0架

梅姐最後concert DVD

終於可以睇到梅姐最後0既concert個DVD喇
真係等到我頸都長呀
雖然一個嘉賓都無
(真係美中不足0架
好心d唱片公司當係賣大包又好
造福人群又好啦
就唔好咁計較d版權費呀分紅咁喇
話晒人都去0左
當係做一個紀念都好丫)
不過真係好正
由其是d衫
真係件件都好靚呀
我好鍾意0果件粉紅色裙同埋黃色裙
真係好靚呀
至於唱呢
我仍然都係覺得梅姐唱得好好
老實講
咁重病
講0野都唔易啦
仲要係唱歌0添
就算係坐0係到唱呀
都好0徙氣0架嘛
何況梅姐都唔係成日坐0係到0者
有part仲要跳0添
雖然就已經唔係好似以前咁跳得咁勁喇
其實都明白點解梅姐在生時咁堅持要做呢個concert
一來真係可能係為錢啦
二來都可能係一個心願0黎0既
咁樣好似個人生會完滿d
話晒都好0黎好去嘛

圈套3

好耐無寫日記喇
上個禮拜Victoria Day 0既long weekend除0左去Niagara Falls之外
無咩好特別
不過0係0果幾日又煲0左套日劇“圈套3”
無上一集咁搞笑囉
同埋d案比較牽強囉
好似再唔係用一d小trick
而係一d比較大0既工程
好似要用埋吊臂呢d重型工具
而唔係用0下啤牌呀呢d小玩意0黎扼人囉
最好睇就係講爭家產0果個單元
因為係最符合“TRICK”呢個concept
而講老人院0果個都OK 0既

白色巨塔(二)

呢排唔知搞乜鬼
好似好無時間用咁
又開始去搵工啦
想轉0下環境
呢份工太“梳乎”啦
搞到我好似好無衝勁咁
不過就唔急0既
有咪即管去見0下囉
無都可以繼續等0既

唔知係咪d香薰0既關係
呢輪訓得好0左
有發夢但係起0左身就唔記得喇

Weekend終於睇完“白色巨塔”啦
真係好鬼正呀
尤其結尾
我覺得財前打輸官司多多少少係佢自己摞0黎0既
如果佢唔係將個責任推晒俾柳原
柳原都唔會供佢出0黎啦
而君子亦都唔會告發佢
老實講
如果佢打贏官司然之後再知道染0左癌症而死0左
我覺得咁仲有震撼力
就好似乜0野都順晒自己意思
好似個天乜都幫晒自己0既時候
以為乜都會雨過天晴
連做錯事都唔駛負責任0既時候
忽然間知道自己生癌
仲要係末期
得番三個月命
咁樣先至係仲更加刺激囉
不過
如果真係財前贏0左場官司0既話
就好似話俾全世界知日本0既司法制度好唔掂(係咪真係唔掂我就唔知)
祗要有錢就乜都得(其實呢個世界就係咁0架啦)
害死人都可以逍遙法外
0係臨尾財前死0左0個段我真係眼濕濕0架
雖然佢係有錯有疏忽
但係都不失為一個好好技術0既外科醫生丫

唐澤壽明真係做得好正
雖然呢一part無俾到我0果種好懾人0既感覺(可能已經係睇慣0左)
但係都真係做得超好呀

白色巨塔

尋晚睇“白色巨塔”下半part睇到半夜成四點幾
不過仲未睇完
仲有成四集至完
我覺得第一part緊湊d
講財前同佢外父點樣賄賂d人去投佢做教授
我相信呢個世界真係有好多呢d人
不過呢part都唔弱
主要祗係講點告財前判錯症
日本0既醫療制度係咪真係咁黑暗呢
當d醫護人員0係度改病歷0既時候
就令我諗起日本篡改歷史
整走0左南京大屠殺單0野
原來佢地有d人真係覺得呢樣0野係無問題
佢地話就話係咩重整證據
但係祗係用一個好聽d 0既名0黎做藉口0者
其中里見有一句說話
話如果d病歷係無錯無問題0既話
又駛乜“重整”呢﹖
當做到上庭0既時候
到柳原俾口供時
我就0係度諗
如果我係柳原0既話
我又會點做呢﹖
如果講真說話
就無得再0係0果度做醫生
如果講假
除0左會受良心譴責之外
如果被發現0既話
會俾人告俾假口供喎
好似點做都係死咁
真係好難可以做到里見咁瀟灑
可以祗係為0左講出真相
連自己份工同埋老婆同個仔都可以唔要
如果我係里見
我都真係唔知應該點做
雖然話人不為己天誅地滅0者
但係另一方面又會覺得好自私
為0左自己份工同埋做研究0既經費
去令其他人得唔到應有0既公平
不過呢個世界就係咁樣
咁殘酷
咁唔公平0架喇

歲月如飛呀

今日都好易過
其實呢個禮拜都幾容易過
過得幾快
同埋無乜麻煩0野發生

0岩0岩睇完一段SMAP 0係96年上Hey Hey Hey 0既片段
佢地0果時真係好後生呀
木村笑起上0黎一d紋都無囉
仲有睇番244帶耳環0既樣
真係好耐都無見過喇
我諗佢以後都可能唔會點帶耳環0架喇
好經典囉
而家個個都真係大個0左好多囉
唉﹐都唔想用個老字呀
但係真係唔可以唔認歲月催人囉
而家除0左Shingo睇起上0黎比較後生之外
真係個個笑起上0黎d紋都好犀利囉
諗起上0黎
原來唔覺唔覺我都鍾意0左佢地成6年喇

係呀
真係歲月如飛呀
好多0野唔覺唔覺咋
原來都0係度變緊0架
就好似我12月0果時返York考日文試咁
個感覺好熟悉又好陌生囉
好似真係返番去大學時代咁
個location無變
但入面好多0野都已經人面全非喇
好簡單
就好似Central Square個cafe咁
以前d凳係好舊咁
但而家就全部換晒好似快餐店d凳
仲有埋把遮0係每張檯0既中間0添
同埋library出面多0左好多電腦比人上網囉
唔係話唔好0既
但係總係覺得好似唔係以前我成日返
返0左4年0既university咁囉
個感覺真係好怪

林振強的警世語句

在網上copy的...
我覺得應該仲有好多更好0既
好懷念以前可以0係壹週刊睇到洋蔥頭個專欄呀。

- 常以為還有下一次，所以不懂得珍惜這一次。

- 走下坡的時候，路是平坦無阻的。

- 頹廢的意思，不是Cool；而是Fool。

- 唯一別人搶不去的東西，就是時間、所有的時間，都是等我們自己失掉的。

- 其實世界上只有兩種人，落手落腳的和指手劃腳的，遺憾的是後者是不沉默的大多數。

- 每個願打的人背後，都有一個願捱的人。

- 我們沒有什麼記不起，也沒有什麼放不下。

- 直覺的正名是『靠撞』。

- 要做個快樂的人，並不需要天天都有愛情，也不需要每天都有麭包，但一定需要每天都有大便。

- 愛遇見了不起的人，怕遇見對不起的人。

好激氣呀﹗﹗﹗﹗

今日好鬼激氣囉
本來以為可以慳番d
點知因小失大
好憎我自己囉
點解咁鬼失魂0架
點解咁無用0架
唉﹐唔係銀碼問題
而係無得好唔抵囉
話就話可以當係破財擋災0者
咁都要俾我知道擋0左d乜0野災至得0架
點解呢d衰0野永遠都要發生0係我身上0架﹖﹖﹖﹖
“何必偏偏選中我”﹖﹖﹖﹖﹖唉!

好彩今日有SXS中和番0即
係斬晒件0既love award
其實呢d應該要成個節目睇先至好睇0既
因為無情情中間起首睇都唔知發生緊乜0野事
不過無所謂啦
有得睇就得喇
最搞笑就係木村同吾郎同埋兩個女人0果段
(一個應該係神田宇野﹐一個老0既唔知係乜水)
木村抽籤抽贏0左
話要抽到一號同五號0果兩個人kiss
點知一號就係吾郎
五號就係個老女人
都唔知木村係咪知道係咁先至有呢個要求
不過最搞笑0既係吾郎真係同個老女人嘴對嘴kiss囉
木村真係大整古呀

鐵板燒 X 容祖兒

今晚去和風食鐵板燒
好耐無食過喇
之前好多次去都係食壽司同埋魚生
況且我都好耐無去0果度喇
d味道都OK
不過我覺得以前d好食d
同埋個壽司唔係整得咁好
個うに都OK啦
不過呢度比較平
同埋同其他d比都算係比較好食

今晚已經係第N次睇容祖兒隻2003年尾開0既CONCERT個DVD
不過仲未厭0既
d歌係真係好聽
同埋佢真係唱得好好囉
無論快歌同慢歌都好穩定
高音低音都handle得好好
唱live唱到咁真係唔易0架
而且佢仲係咁後生0添
0岩0岩試聽緊佢隻CD
除0左“一拍兩散”之外
隻“借過”都非常之正

今日好暖呀﹗﹗

今日好暖呀
又好天喎
好大個太陽呀
有成24度呀
好正呀
好開心呀﹗﹗
今日好似個個0既心情都好好0添呀
如果日日係咁就正喇

唉﹐我塊面又敏感喇
個Shiseido真係要拎返去refund喇
好彩我尋晚搽0左D藥膏今朝就好似無紅得咁犀利
不過就搞到好乾囉
唉﹐Shiseido都真係信唔過
其實買0果陣時睇到係USA做0既個心就已經講0左句“弊喇”
點知真係出事
本來都keep得好好地0架嘛﹐唉!

碧咸有外遇

尋日睇明報週刊
話好多人對碧咸0係出面有外遇感到震驚
當然
呢個係好易理解0既
一個一路以來0既形象都係好好先生0既名人
以往報導都係話佢點好點專一
0係公眾場所都祗係將自己“柄”埋一邊
無周圍蒲
宜家搞到咁大鑊
d人梗係跌晒眼鏡啦
不過我就唔係話事後孔明
不過我一直都覺得佢係咪真係咁好呀
一個又靚仔又出名又有錢又後生0既人有無咁完美呀﹖
0果時我都係諗還諗
都唔想佢係有呢d事發生0既
不過話時話
我又唔知當時係點
又唔知詳細情形
況且我又唔係男人
真係想像唔到男人0係當時面對一個女人0既時候0既心理

讀書制度

係喎
就0黎五月喇喎
如果讀U 0既話就應該差唔多考完試放假啦
唉﹐真懷念讀U祗係番七個月學
放成五個月假
一個月係聖誕
如果d試早考完
又或者無試考0既就真係有成個月0架
四個月summer
雖然每年我都有take summer course
不過就真係好易過囉
d時間又flexible
真係幾歎0架
不過我祗係唔鍾意有測驗考試之嘛
不過呢d又無可能避開0既
如果呢個時候0係香港讀F.5就0黎要會考喇
唉﹐簡直就係天大0既惡夢呀
個制度好唔掂
拉乜鬼0野curve丫
我覺得d成績根本唔可以反映到我真正0既成績囉
有乜理由就咁就決定一個學生0既前途呀
一試定生死
好唔公平囉
係﹐我會考成績係唔好0架
但係呢個唔係我投訴0既原因囉
根本差唔多全部都係照背
照般字過紙
個marking scheme又死板
有答呢一點就有一分
無答就乜都無
咁如果個答案又make sense又有思想0既咁都算錯咩﹖
所以我鍾意0係呢度讀書就係d題目唔會條條都咁死板
會問學生0既opinion
祗要佢地用所學到0既0野去support佢地0既觀點就OK
老實講
我0係呢度0既成績好過0係香港十萬九千倍
我又唔係勤力好多
同埋我覺得呢度d老師教得好好多囉
至少佢地會make sure所有學生明晒先啦
香港0果d祗會教完就算
唉﹐咁點得0架
如果我0係香港讀書我死0左十世喇
仲有得讀U仲拎埋個honour咩
不過就咁
我就唔知宜家0既情況仲係唔係我0果陣時咁
話晒我考會考都已經係12年前0既事咯
都話歲月催人0架啦
唔經唔覺呀真係

心情唔好呀﹗

今日心情超級勁唔好呀
又受天氣影響(天陰陰﹐落大雨)
又無乜好做
好唔知點囉
尋晚又係訓得唔好
真係好難頂呀
究竟點先至會無咁多夢發呀
個腦好累呀
我已經算係無乜壓力0架啦
點解仲會係咁0架
唉!

尋日買0果隻Shiseido防晒粉底唔知係咪我無用0果個海綿0黎推
搞到搽0左上塊面之後怪怪咁
好唔開心囉
又要即刻洗甩晒佢喎
好狼狽囉
好彩都算做易洗甩
之後塊面都無乜0野
下次再用埋個海綿睇0下仲會唔會搞到咁衰先

香薰

尋晚試0左上次easter0果時0係太古買0既lily味0既香薰
唔知係咩原因
我都係唔係訓得好好
而且d味又好似好快就散0左咁(唔通我落得少﹖我已經落0左六滴喇喎)
不過都算幾香
又唔算好濃味

80句勉勵自己金句

今日上網睇到0既
希望大家公勉之
藍色字0既comments係我加0既


01. 每天告訴自己一次，『我是最優秀的』
未試過﹐我係好自卑﹐如果萬一我發現自己原來唔係咁“優秀”0既時候﹐我唔敢想像我會有幾傷心﹐自己知自己事啦。

02. 生氣是拿別人做錯的事來懲罰自己
無錯﹐但係有時0係0果一刻好難唔嬲﹐最多要自己好快咁無事啦。

03. 生活中若沒有朋友，就像生活中沒有陽光一樣
同意﹐朋友真係好緊要﹐不過祗係要好0既﹑令自己舒服﹑真心對自己0既朋友﹐而唔係一D豬朋狗友﹐同埋d酒肉朋友。

04. 明天的希望，讓我們忘了今天的痛苦
係﹐人係要向前看0既﹐雖然我覺得有時懷0下舊都唔錯。

05. 生活若剝去了理想、夢想、幻想，那生命便只是一堆空架子
我覺得一定要有個目標囉﹐不論係大或小﹐無目標會覺得做人唔知為乜0架。

06. 發光並非太陽的專利，你也可以發光
某程度上我都覺得係0既﹐不過要睇埋天時地利人和囉﹐呢d都好緊要0架嘛。

07. 愚者用肉體監視心靈，智者用心靈監視肉體
唔...好深奧呀。

08. 獲致幸福的不二法門是珍視你所擁有的、遺忘你所沒有的
絕對同意呀﹗﹗

09. 貪婪是最真實的貧窮，滿足是最真實的財富
都好同意呀﹐所以我成日都有警惕自己唔好貪心0架。

10. 你可以用愛得到全世界，你也可以用恨失去全世界
無錯﹐恨真係可以令自己失去理性0架。

11. 人的價值，在遭受誘惑的一瞬間被決定
哈哈﹐唔知係唔係真呢﹖

12. 年輕是我們唯一擁有權利去編織夢想的時光
無錯﹐年輕時真係可以試好多0野。

13. 青春一經典當即永不再贖
當然﹐一去不返嘛。

14. 沒有了愛的語言，所有的文字都是乏味的
係呀﹐仲要加埋適當0既語氣。

15. 真正的愛，應該超越生命的長度、心靈的寬度、靈魂的深度
無錯﹐但世事有無咁完美先﹖

16. 愛的力量大到可以使人忘記一切，卻又小到連一粒嫉妒的沙石也不能容納
好入肉﹐尤其是第二句。

17. 當一個人真正覺悟的一刻，他放棄追尋外在世界的財富，而開始追尋他內心世界的真正財富
我信呢個世界真係有呢d人0架﹐不過我仲未到呢個階段﹐自己無財富又點去追求內心0既財富呢﹖

18. 只要有信心，人永遠不會挫敗
但又唔可以過份有信心囉﹐過份自信會累死人0架。

19. 不論你在什麼時候開始，重要的是開始之後就不要停止
無錯﹐我都有同樣0既諗法﹐千祈唔好半途而廢呀。

20. 不論你在什麼時候結束，重要的是結束之後就不要悔恨
同之前0果句一樣﹐我一直以來都有呢個諗法﹐我做0野好少後悔0架。

21. 人若軟弱就是自己最大的敵人
都係0既﹐太軟弱係唔得0既。

22. 人若勇敢就是自己最好的朋友
我都要令自己勇敢d﹐我太細膽喇。

23. 『 不可能 』只存在於蠢人的字典裡
Well﹐但唔係有d事真係無可能0架咩﹖

24. 抱最大的希望，為最大的努力，做最壞的打算
係﹐最理想就梗係咁啦。

25. 家!甜蜜的家!天下最美好的莫過於家!
Depends on個家係咩家啦﹐呢個世界上有咁多倫常慘劇。

26. 遊手好閒會使人心智生鏽
嘻嘻﹐都係0既﹐做人又唔可以太頹廢。

27. 每一件事都要用多方面的角度來看它
係﹐太主觀真係唔好﹐不過呢個世界上有好多人都好主觀囉。

28. 有理想在的地方，地獄就是天堂
唔﹐睇0下個地獄係點地獄法先。

29. 有希望在的地方，痛苦也成歡樂
同上句一樣﹐睇0下自己點define痛苦囉﹐有時祗係自己以為好痛苦0者。

30. 所有的勝利，與征服自己的勝利比起來，都是微不足道
又係好深奧呀。

31. 所有的失敗，與失去自己的失敗比起來，更是微不足道
唔﹐係卦。

32. 上帝從不埋怨人們的愚昧，人們卻埋怨上帝的不公
但我真係覺得呢個世界係唔公平0架喎。

33. 美好的生命應該充滿期待、驚喜和感激
係﹐如果無呢三樣0野﹐做人都無咩意思啦。

34. 世上最累人的事，莫過於虛偽的過日子
唉﹐真係呀﹐成日帶住個假面具真係好累0架。

35. 覺得自己做的到和不做的到，其實只在一念之間
唔﹐都會係0既。

36. 第一個青春是上帝給的；第二個的青春是靠自己努力的
都係0既。

37. 少一點預設的期待，那份對人的關懷會更自在
係﹐理論上對人好係唔應該望有咩回報0既﹐不過呢樣0野祗係0係烏托幫至有囉。

38. 思想如鑽子，必須集中在一點鑽下去才有力量
係﹐一定要堅持到底呀。

39. 人只要不失去方向，就不會失去自己
係﹐所以做人要有目標囉。

40. 如果你曾歌頌黎明，那麼也請你擁抱黑夜
我比較喜歡黑夜多d囉。

41. 問候不一定要慎重其事，但一定要真誠感人
係﹐不過呢度d人一開口埋口都講你好嗎0架啦。

42. 未經一番寒徹骨，焉得梅花撲鼻香
都係0既﹐有努力過﹑失敗過﹐先會感受到成功0既喜悅0架。

43. 當你能飛的時候就不要放棄飛
係呀﹐當自己仲有能力做0既時候就好去做啦﹐有d事過0左去就返唔到轉頭0架喇。

44. 當你能夢的時候就不要放棄夢
同上面0果句一樣囉。

45. 當你能愛的時候就不要放棄愛
又係同上。

46. 生命太過短暫，今天放棄了明天不一定能得到
係﹐所以我都幾贊成及時行樂0架。

47. 天才是百分之一的靈感加上百分之九十九的努力
都係0既﹐努力都好重要0架﹐不過我覺得都仲係要配合好多0野囉﹐邊有咁簡單0架。

48. 人總是珍惜未得到的，而遺忘了所擁有的
人性係咁0架喇﹐儘量做啦。

49. 快樂要懂得分享，才能加倍的快樂
係﹐獨樂樂不如眾樂樂嘛。

50. 自己要先看得起自己，別人才會看得起你
絕對係呀﹐如果自己都踩自己﹐都話自己唔掂0既話﹐其他人仲點會睇得起自己丫﹐呢d絕對唔係咩謙虛囉。

51. 一個今天勝過兩個明天
又係好深奧﹐可能遲d會明卦。

52. 要銘記在心；每天都是一年中最美好的日子
係呀﹐要活得快樂呀。

53. 樂觀者在災禍中看到機會；悲觀者在機會中看到災禍
不過都要居安思危0既。

54. 有勇氣並不表示恐懼不存在，而是敢面對恐懼、克服恐懼
係﹐咁先會成功囉﹐不過就係有難度。

55. 肯承認錯誤則錯已改了一半
好句呀﹐呢個世界真係有太多人唔肯認錯喇﹐自己係錯0既話認0左佢又有咩緊要呢﹖老實講﹐大家都係成年人﹐都係有腦0既﹐識諗0野0既﹐有錯唔認仲要跌落地執番碴沙﹐死雞撐飯蓋﹐係人都會睇得出0架啦﹐唔好當人地無腦﹐係白痴至得0架﹐人地唔識穿你唔好當人地係懵丙﹐咁樣做其實一方面0係度侮辱緊人地0既智慧﹐令一方面又話俾人知自己有幾低能囉。

56. 明天是世上增值最快的一塊土地，因它充滿了希望
都係0既。

57. 理想的路總是為有信心的人預備著
咁又係呀﹐都話無信心係唔得0架啦。

58. 所有欺騙中，自欺是最為嚴重的
好呀﹐不過有太多人以為自欺就等如連其他人都會欺騙埋囉。

59. 人生最大的錯誤是不斷擔心會犯錯
唔﹐都係0既﹐太過船頭驚鬼船尾驚賊都係唔得0既。

60. 把你的臉迎向陽光，那就不會有陰影
都係0既。

61. 經驗是由痛苦中粹取出來的
咁又係呀﹐錯得多至會學精0架嘛。

62. 用最少的悔恨面對過去
無錯﹐最好做到無後悔。

63. 用最少的浪費面對現在
儘量啦。

64. 用最多的夢面對未來
都係0果句﹐做人要有目標。

65. 快樂不是因為擁有的多而是計較的少
咁又係﹐斤斤計較﹐自己唔累﹐人地都厭啦。

66. 你的選擇是做或不做，但不做就永遠不會有機會
都係0既﹐點都要踏出第一步。

67. 如你想要擁有完美無暇的友誼，可能一輩子找不到朋友
不過都要有所要求囉﹐我唔希望做朋友好似著衫咁﹐成日換囉。

68. 不如意的時候不要儘往悲傷裡鑽，想想有笑聲的日子吧!
好典型0既安慰人0既一句說話﹐要做到真係要靠自己。

69. 把自己當傻瓜，不懂就問，你會學的更多
係﹐不恥下問嘛。

70. 要糾正別人之前，先反省自己有沒有犯錯
我覺得應該係“先反省自己有沒有犯同樣0既錯”﹐唔好做到識話人唔識話自己。如果無犯過錯先可以糾正人﹐咁我相信呢個世界無人可以話其他人喇﹐有邊個會無犯過錯至得0架﹖

71. 因害怕失敗而不敢放手一搏，永遠不會成功
都係0既﹐唔可以太膽小。

72. 要克服生活的焦慮和沮喪，得先學會做自己的主人
係﹐不過我覺得有d事係身不由己0既﹐唔係個個都咁好運可以做自己的主人囉。

73. 你不能左右天氣，但你能轉變你的心情
好0岩我﹐我好易俾天氣影響心情﹐但係呢樣0野係天生0架囉﹐我都好想去改呀﹐但係唔係話話改就改到囉。

74. 孤單寂寞與被遺棄感是最可怕的貧窮
孤單寂寞都還可以﹐被遺棄真係好難頂。

75. 想像力比知識更重要
唔﹐某程度上係囉﹐但0係呢個世界上﹐0係呢個咁0既社會﹐單單有想像力而無知識都係唔掂0既。

76. 漫無目的的生活就像出海航行而沒有指南針
係啦﹐有目標嘛。

77. 好好扮演自己的角色，做自己該做的事
好贊成呀﹐做好自己﹐對得起自己係最重要0既。

78. 一切偉大的行動和思想，都有一個微不足道的開始
所以話唔好睇小每一個過程呀。

79. 得意時應善待他人，因為你失意時會需要他們
其實就算失意時係點﹐需唔需要其他人都好﹐自己係唔係0係得意0既時候都好﹐0係咩時候都係要善待他人0架啦﹐唔係話唔好望有回報0架咩﹖不過我明呢句0野講乜﹐唔好咁見風駛裡呀嘛。

80. 學做任何事得按部就班，急不得
咁就係呀﹐欲速則不達呀﹐我都試過唔少喇。

花茶

Easter個禮拜六0係太古買0左樽粉紅玫瑰0黎沖花茶飲
都飲0左差唔多兩個星期喇
都算OK啦
初初飲0果時覺得d味有少少怪
但飲多0左就覺得都幾好
最初聽個Sales講話落三粒
點知濃過頭
原來落一粒都已經OK
仲可以沖成三杯都仲未淡
我隻杯仲要係大杯0添
不過今日睇0下0果樽粉紅玫瑰已經剩番三分二咋

今日同個朋友講話我開始寫日記
其實嚴格0黎講都唔係咩日記0既
祗不過係一d發生0係我身上0既0野
又或者係我對某d 0野0既諗法0者
佢問我點解要寫
我就話想之後再睇返之前發生過0係自己身上0既0野會好得意
咁佢就話如果係大單0野又或者係重要0野都會記得0架啦
咁都係0既
會記得有發生過某樣0野囉
但係當時係點
詳細情形係點
我會唔記得囉
都係記低好d
有時諗返以前無寫日記呢個習慣
要諗返當時某樣0野發生0既情形係點都記唔起喇
有d可惜0既感覺囉

無得勉強

鍾意同唔鍾意某一樣0野或者某一個人係非常之主觀
如果唔鍾意0既話唔見唔聽唔睇又有咩唔妥呢﹖
總好過又要見又要聽又要睇但同一時間又0係度埋怨又有不滿啦
我鍾意0既唔需要任何人去肯定
亦都唔會理其他人鍾唔鍾意
我唔鐘意0既亦都唔會去勉強自己去鍾意
亦都唔會阻止其他人去鍾意
好老土講句
呢d唔可以勉強嘛
每個人都有自己喜惡0架啦
有時鍾意就係鍾意0架啦
無乜好大理由
自己舒服咪得囉

SMASMA

今日又係星期一啦
又有SMAPXSMAP喇
做0左咁多年仲有得做
內容變化係好緊要
我覺得無論點變都好
一定要有d環節係5個一齊做先得
可以係比賽
亦都可以係其他0野
因為佢地之所以咁吸引就係因為5個人集埋一齊所做出0黎0既化學作用
呢樣係少0左其中任何一個人都無可能做得到
今日睇番之前未睇完0既唱歌環節
Dreams Come True做嘉賓
唱0既最尾首歌我好有感覺
叫做"未來予想圖"。

張小嫻小說

尋晚興起睇0左少少張小嫻0既小說
都好耐無睇過佢0既書喇
以前我真係好迷佢d小說0架
98年返香港仲專登帶埋之前買0左0果幾本小說返去書展搵佢簽名
其實我仲係好鍾意佢0既書
不過最近又懶又無咁多時間睇0者

佢d書同其他小說好唔同﹐
唔係一般文藝小說咁
內容比較同現實接近
唔會話跟本無可能發生0既事
同埋我最鍾意0既就係佢用0既文筆同埋d形容詞
真係又啜核又一針見血
好多時都會令我會心微笑
以前
真係好耐以前喇
當佢仲有同蘋果日報寫專欄0既時候
當蘋果日報仲係可以免費上網睇0既時候
我真係每日都有睇
仲要係第一時間睇0添呀
不過之後佢就停0左無0係蘋果度寫喇
再之後仲連明報都停埋0添
0果時真係好失落0架
我仲有寫個email去俾佢0添
以前睇佢0既書
真係可以睇到滾瓜爛熟0架

我好鍾意佢Channel A 0果個concept
人同人就真係一個一個咁連繫住
每一個人都會有佢自己0既故事
同一時間同一地點都會0係唔同人0既身上發生唔同0既事
有開心有唔開心
雖然係0係同一時間地點
但係發生0既事可以係好極端
而呢個根本就係0係現實生活每分每秒都0係度發生緊0既0野
最初睇好似d關係好複雜咁
不過睇落去就覺得好interesting喇

飲歌

曲：伍樂城@RNLS | 詞：林夕 | 編：伍樂城@RNLS

我們要一起高歌快樂上學去
我們是耶和華最寵愛的兒女
我們在時代與金曲之中失去
愛侶及同伴哪年再共聚

曾遇上幾多歌要天天唱六次
留下了幾多首我喜歡到現時
到最後明白最好不應得一次
曾伴我捱大過 應該會知

一開心唱飲歌
不開心唱飲歌
當中紀錄我這麼長大過
每次也貪到這首那首還要唱 很多是你麼?

一失戀唱飲歌
入肉的都算多
今天卻後悔最初竟表達錯
終於都瞭解犯過錯以後才清楚
什麼感情易唱出我

還幸你在場 令我不至蕩
失於這漂亮遊樂場(來現場)
同伴成長 (不必緊張)

人大了珍惜今次不可有下次
成熟了每天都要精彩過舊時
過去但求亂唱得怎麼都可以
這次當對著前度要他高舉姆指

捨不得有幾多
得不到有幾多
這感覺大概你都遭遇過
你也要緊記這手那手誰與你的手拍著拖
請一起唱飲歌
但願懂得更多
不想再後悔最初怎麼犯錯
經典的紀憶熱唱過以後才清楚
大家怎樣伴我走過

昨日曾愛過什麼 得你教曉我

* * * * * * * * * * * * *

我好鍾意唱歌
由細到大都鍾意
所以極之鍾意唱K
呢度唔同香港
唔係隨時隨地都有新歌聽
所以有好多歌都係0係唱K時聽到
呢首歌都唔例外
d歌詞好到肉
好正

Hamilton一日遊

三日0既復活節假話咁快就過0左0勒
聽日又要回復正常喇

星期六去0左Hamilton搵朋友
原來Hamilton無乜特別
可能我地先去downtown
所以好似好舊咁
同呢度0既downtown差唔多
都係有好多越南人

我地去0左兩個瀑布
Albion同埋Damen
都算易搵
同埋可能Hamilton唔係咁大
所以去兩個都唔需要花好多時間

去Albion本來想沿住條路仔行落去
可以近d睇清楚d個瀑布
但係最衰又無指示
又多分叉路
所以行錯0左
無落到去
祗可以0係parking度離遠望
都OK啦
其實唔係好大個瀑布
闊闊地
有兩級咁囉
個view都唔錯0架

當行緊條trail時
感覺有d似0係日本上高地行緊咁
好正

之後去Damen個瀑布
呢個同Albion好近
好快就到
不過呢個仲細
祗係一條水咁0係上面衝落去
不過呢度可以見到Hamilton個view
都幾靚0架
不過呢日就好大風
兼唔係有咁多陽光
如果唔係就會仲靚

做0左highlight啦

星期四0個日去0左剪頭髮兼做埋highlight
呢次我揀0左比上次金色少少0既顏色
不過搞完之後就好似金0左d
都係上次個色自然d
不過洗0左一次頭之後
再加上可能睇慣0左
所以而家覺得都OK

好想食......

好想食咖哩飯
好想食日本菜
好想食pasta
好想食韓燒
好想食蔗蝦同埋牛肉粉
好想食好多好多0野...

但係...
會肥(係肥0係唔應該肥0既地方)
會膽固醇高
人肥0左好難減(由其某d部份)
膽固醇高0左都好難低

點解會咁易肥﹖
點解咁快就會有膽固醇高﹖
我諗都無諗過我會有膽固醇高0架
乜呢d唔係應該臨近退休年齡又或者好肥0既人先至會有0架咩﹖
我又唔係食好多0野
又唔係食好肥0既0野
我已經好忍口0架啦
好多0野都無食咯
仲會肥﹐仲會膽固醇高0架﹖﹖

雖然有人話我唔係肥
但係自己知自己事啦
自己有眼睇0架嘛

夏令時間開始

聽講今日好凍(嘻﹐我今日無出街)
零下氣溫
不過不幸中之大幸就係會多番d陽光
唔該唔好再凍喇
都四月啦
夏令時間都開始0左喇
春天又到0左十世喇
都仲咁凍
好難頂囉

食晏0果時睇0左SMAP上年個concert個DVD 0既中至尾段部份同埋個MC
呢個concert買0左返0黎無乜點睇過
我諗睇0既次數一隻手0既手指都數得晒
其實就唔係好似我作風0既
不過係DVD
又唔可以0係電腦睇
無辦法啦
其實呢一年個演唱會唔係咁好睇
一來d新歌我唔係咁熟
之前0係internet聽過隻碟
但覺得唔係咁吸引
所以無買到
二來太多d動畫公仔木偶短劇
唔知講乜之餘
又實在太長喇
有少少悶
不過佢地5個0既表演真係仲係好好(雖然平均年齡已屆29.6歲...)
又跳又唱
唔係太覺佢地原來已經咁大
仲有就係睇0果時唔係好覺木村已經結0左婚有兩個女囉
我以為佢結0左婚之後如果再唱一D又快又有D IDOL風0既歌(例如﹕SHAKE)會好怪
但好彩無呢個感覺
再加上接近encore部份直至最尾完場d歌我都識
所以比較投入囉
好期待今年個concert
不過直至宜家為止都仲未有任何新single又或者新碟0既消息(GORO隻solo唔計啦)
不過佢地一向0既作風都係去到最後一刻先至知道個concert個concept係乜0野0架喇
就算個出碟日期預先有消息
個日子都會一改再改囉

ECHO唱K

尋日終於試0左ECHO
老實講
比我想像中差
間房又舊
又成陣煙味
個咪又唔係咁好
唱完個人好似去0左吸煙區一樣
不過8蚊
又包0野飲(UNLIMITED﹐雖然祗係得咖啡奶茶汽水)
唱成5個半鐘
都算OK
d歌都夠新
不過唔知係咪飲得太多奶茶(4杯)
去食飯0果時覺得好鬼唔舒服
又手震
個頭又wing wing地
攪到我0野都無乜點食過
不過就咁
我就真係唔係咁肚餓0者
結果尋晚訓得勁差
食完0野就訓真係唔係好掂
不過唔訓我又覺得好累囉
唉﹐唔想再攪到唔舒服喇

TO BE OR NOT TO BE

TO BE OR NOT TO BE
Hamlet裡面0既名句
原本係形容個主角0係度掙扎緊去唔去殺人
不過亦可以引伸去形容去唔去某個地方
或者做唔做某件事
有時雖然係一件小事
但係都好難做決定
最主要係要諗點樣去refuse
或者諗excuse就最傷腦筋
自己唔想做
又唔想逼自己做
但又怕得失其他人
費事俾人話唔俾面啦
所謂進退兩難呀
有d事
有得揀
又唔知點揀
無得揀
又嫌無得選擇
逼住要做
要個選擇配合到全部人真係好難
每個都係成年人
每個人個性格都已經係定0左
都有自己0既喜惡
你想0既又未必係我願意0既
我覺得好0既你可能覺得差
你話無所謂又唔知係咪真心
到頭來個選擇你覺得唔係咁滿意又會攪到個氣氛怪怪咁

炒雜碎﹑乜都有

今日心情唔係咁好
發覺原來好多0野
0係自己0既思想中
同0係別人0既思想中
係可以有好大0既分歧
應該咁講
原來自己一直認為係應該做0既0野
0係別人眼中可能係好微不足道
甚至係有d多餘
或者係好難理解0既一件事
唉﹐點解會攪成咁呢﹖
我當然覺得自己無乜問題啦
祗不過係想將自己唔要或者已經知道係無用0既0野退返出0黎俾其他人0者
咁都唔0岩咩﹖

好彩今日係星期五
不至於心情完全一面倒係差0既
都總算可以balance番
今日公司都好靜
可能一來係禮拜五啦
二來我都覺得生意係少0左
比起我剛0黎做0果時少0左
老實講
如果0果時係咁0既環境
就唔需要請我啦

頭先睇0左壹週刊
話宜家d八十年代0既歌0既CD最多人買
最賣得
我都覺得0果時d歌好聽d
同埋d人唱得好好多
即使係d唔係咁出名0既都OK
如果真係唔唱得0既就一早俾人out 0左十世喇
邊有好似宜家咁走晒音都可以紅0架
不過講開又講
0果時就無咁多翻版(就算有個quality都好差﹐同正版差好遠)
又無MP3響internet度可以download
而且d人0既需求真係變0左
香港成個大氣候都係咁
根本個環境同以前已經唔同0左
無得比較0架喇

衝動﹖

我渴望自由 讓我衝天飛

當初的我太衝動

* * * * * * * * * * * * *

哥哥
一年好快就過0左去喇
你有無諗過你當初係咪衝動0左d呢﹖
上兩個禮拜第N次睇你0既最後一個演唱會個DVD
我相信0係當時(2001年)你並無諗過呢個會係你最後一個concert﹐係咪﹖
其實呢隻DVD係0係你唔0係度之後買0既
當初無諗住買係因為唔係咁識欣賞你個髮型
咁長頭髮
其實我都可以接受
但係再加上汗同埋油
我就覺得好似好污遭咁
當然係望上去係咁啦
不過點知呢隻DVD係我其中睇得最多0既一隻
當你唱到“儂本多情”0既上面0果兩句歌詞0既時候
我就覺得好sad好可惜
因為我真係覺得當時0既你太衝動喇
不過當你唱0果d我由細聽到大0既舊0既快歌0既時候
我就會好興奮地跟住一齊唱
畢竟你係其中一位0係我成長期間最紅0既一位歌星
你有咩hit歌我係唔識唱0架﹖

Anyway﹐永遠懷念你﹗

逃避你

逃避你

曲：伍樂城 | 詞：李敏 | 編：

世界最遙遠的一種相距中
明明迷戀 然而又不知怎向你形容
呆想 只會越盼越凍
我怎麼可得到你認同 我不清楚 不太懂

世界最遙遠的一種相距中
明明情深 然而亦不敢親切地抱擁
呆等 感覺被我斷送
縱使看不清所愛面容 仍未敢伸出我手觸碰

逃避你 卻又期待我可跟你做情人
而用情的心可天昏地暗
逃避你 愛是遙又遠得很
而我始終不敢靠近 還是不相信能和你合襯

世界最遙遠的一種相距中
明明留戀 然而讓輾轉的掛念撲空
回憶 心裡越載越重
卻不珍惜這一次重逢 我的思想像完全失控

逃避你 卻又期待我可跟你做情人
而用情的心可天昏地暗
逃避你 愛是遙又遠得很
而我始終不敢靠近 還是不相信能和你合襯

如共你從沒開始 不會有終結
誰人在意 情在我心的深處不可以停止

逃避你 卻又期待我可跟你做情人
而用情的心可天昏地暗
逃避你 愛是遙又遠得很
而我始終不敢靠近 還是不相信能和你合襯

* * * * * * * * * * * * *

呢首歌我0係2001年去日本0既時候成日聽
因為好多時都要搭長途車
坐新幹線0果時就成日聽容祖兒
唔止咁
因為實在聽得太多喇
所以連d歌詞都會聽得好留心
所以之後對呢首歌個歌詞好深刻
好感受到歌詞入面個女仔0既心情
由其是

"如共你從沒開始
不會有終結
誰人在意
情在我心的深處不可以停止"

呢幾句
有時我諗都無錯0既
無開始過
就唔驚失去
唔驚會無0左
唔驚會完
唔驚會有sad ending
況且無人會注意到自己所愛0既係邊個
祗要自己有呢個感覺就可以喇

叫咩名好呀﹖

今日臨放工同Marie傾開偈
講開我個中文名
雖然佢個老豆係中國人
不過已經視自己係外國人
唔識中文
所以更何況係佢個女呢
Marie話我個中文名好得意
好好聽
話以後要咁樣叫我喎
我就覺得好攪笑囉
我細個0個時都唔係咁鍾意我自己個中文名0既
又唔係好似女仔名喎
聽落好怪咁囉
不過0果時讀小五﹑小六0既時候上中文Mrs. Yuen要叫我地個中文名
咁0果時就聽得比較順耳d囉(講開都有d掛住Mrs. Yuen 0添)
我唔係咁鍾意d人叫我個中文名
不過有個auntie就叫得好好聽喇
其實我都唔係好鍾意自己個英文名0架
不過就覺得比個中文名好少少啦
至少我鍾意d人叫我個英文名多過中文名囉
我記得0係FORM 1 0果時
d先生點名時叫親d學生名都淨係叫個名無叫個姓
幾好聽呀
但係當叫到我0果陣就連名帶姓叫
我覺得又怪又唔好聽囉

呢幾日個天氣勁差
又陰天又毛毛雨
好似就0黎要死咁
好唔自在囉
唉﹐聽講話仲有幾日先至會有太陽喎
最衰我個心情就最受天氣影響0架喇
唔見陽光好難頂0架
仲以為春天0黎0左就好暖0添
點知仲係涼涼咁

走火警

仲記唔記得嘉利大廈火燭﹖
原來已經係好耐之前0既事喇
我諗大概係97年啦
0果時都幾大件事0架
一來死0左好多人啦
二來我到而家仲記得0既就係明報頭版0果張相
0係一片灰裡面有一個燒到黑晒0既人頭
雖然係全部黑晒
但係唔知係張相大丫
定係個resolution夠高
真係可以睇得好清楚
唔單止睇到個頭
仲睇到0果塊面0既表情
係好痛苦
E起棚牙
真係可以感受到0果個人0係臨死前俾火燒得有幾痛
有幾辛苦
之後有報導話之所以咁多人死
係因為d人以為個警鐘係誤鳴
係流0既
所以0係響警鐘0既時候d人仲留0係室內
仲無諗住走
點知之後睇見d火
先至知係大件事
但係0果時想走就已經太遲喇
所以活生生地燒死﹑焗死﹑甚至踩死0左好多人

點解無情白事提番起呢件事呢﹖
因為公司今日大概4點鐘個警鐘響
我直覺就以為係誤鳴又或者個警鐘“神神地”
又或者係好似之前咁試鐘
所以都無乜反應
後尾先至執埋0野
著埋外套走出門口
跟住先至知係真係電梯著火
咁我就諗起嘉利大廈呢單0野
都係因為電梯首先起火0既
當時我先至明白同睇會到點解d人聽到警鐘響都無即刻走
又無睇到煙
又無睇到火
又點會諗住真係會有火燭發生呢﹖
然後我就發覺其實我0既危機意識都好薄弱

唔知想點

前幾日(定係上個禮拜﹖唔記得喇﹐anyway啦
有人問我覺唔覺個生活好悶
其實有時都覺0既
不過其實又唔可以話係悶囉
應該係每一日都做埋d差唔多0既0野
週末又無乜真係好特別0既0野做
呢度d mall又個個好似copy出0黎0甘
呢個mall有呢d鋪頭
0果個mall又係有呢d鋪頭
d衫又唔係話靚
又唔係平喎
所以都無乜興趣行
除非真係有0野需要買啦
如果唔係都唔係咁想行mall
睇戲我又唔鍾意0既
總係覺得俾錢坐0係度睇0野睇成個幾兩個鐘好似好無聊0甘
睇完又如何呢﹖
不過有時約d friends出0黎飲0下0野
唱0下K
吹0下水都幾開心0既
不過而家老喇
唔係好挨得到夜
有時出街早早就返屋企
好無癮囉

其實做人都好矛盾
想生活得安穩d
平淡d
又覺悶
又覺死板
如果勞碌d
操勞d
又嫌辛苦
究竟點先至去到一個平衡點呢﹖
老實講
有時真係唔知自己想點0架

做手術

總覺得我0既記性變差係由0果時開始
雖然我d記性不嬲都係差
好多時去到一個地方拎0野會唔記得要拎乜
讀書要背書簡直就係要0左我0既命
但係總不至於連歌詞同d歌名都會唔記得0架
呢d本來係我0既強項0黎0架嘛。

其實開始寫呢個diary其中一個原因係唔想自己將一d想記住
或者值得記住
又或者應該記住0既事同埋心情想法忘記
雖然有好多祗係一d微不足道0既小事

2003年0既一月六號
我要入院去割一d鼻入面漲大0既肌肉組織
用0黎睇0下點解會變大
0果日雖然個手術時間係下晝12點幾
但係我要0係早上10點幾就要去到醫院登記同準備
0係個waiting room度坐0左成兩個鐘
先有人叫我去換衫
又要帶帽同著特別0既鞋
又再等多一陣
我就入去手術室
個醫生同個麻醉師問0左我d問題之後
我就跟佢地走入去個手術房
之後個麻醉師就0係我隻手背度打d麻醉藥
之後佢地就叫我訓喇
真係話都無0甘快
我就訓著0左喇
當然0係我麻醉緊0既時候係乜0野特別呀奇怪呀0既0野都無發生0係我身上啦
之後
我覺得有人拍我
叫醒我
我就醒0左喇
不過醒0左之後我覺得好凍
之後d人就推我去一個類似病房0既地方
我隻手背依然係插住條管
用0黎將d鹽水注入我體內
我0果時真係好眼訓好疲倦
之後返到屋企仲wing wing地
好辛苦
因為d紗布遮住個鼻
洗面有d麻煩
不過都算OK
有流d鼻血
不過唔算多
個醫生0既技術唔錯呀
我之後一d都無覺得痛呀
第二日都仲未返到工呀
不過到0左第三日就變返精神喇。

睇沉睡的森林個小說
裡面話人0既記憶會隨住時間0既過去
個version會越來越唔似真實所發生0既事
會因為受到周圍環境同埋其他人0既影響
自己將個記憶改變0左
我唔係好信得過我個腦同d記憶
所以想第一時間
或者0係個記憶仲未變型之前
將d所思所想
所見所聞寫低
就算我第日有老人痴呆
甚至失憶
睇返呢d都知自己係點丫。

放不低

已經三個月了
原本以為已經完全放低
原來祗是一個錯覺
當再聽到你的歌聲
是最後最後的歌聲
眼淚不其然已在眼底打轉
原本以為我所有悲傷﹑不捨﹑難過的心情已隨你成為灰燼而離我而去
原來祗是埋在我心入面
從來無消失過

為甚麼﹖
可能是我親身見過你
還要在你的屋內見過你
和你傾過偈
我還記得你屋內的裝修
雖然已經是十五年前的事
雖然你已搬離那裡很久
我更記得你當時的容貌
薄施脂粉(我相信你不會完全無化妝﹐尤其在我這些普通市民面前)
比上鏡時不知好看多少倍
我永遠不會忘記你給我的笑容
可惜當時我實在太緊張了
沒有做任何反應
你可能覺得我很怪吧
你請我食迷你月餅
你問我有無看過你的演唱會
還有﹐當最後我戰戰競競地問你要簽名時
我並無想到你會一支箭地走上樓
去拿兩張簽了名的相給我
你知道我有多驚喜嗎﹖
你還送我你的簽名場刊(對不起﹐我已遺失了)
你在我當時
直至到現時的心目中
已經去到一個無人可取代的地位
最後﹐你仍一臉笑容地叫我有空來玩
我當然知道這祗是一句客套話
我更清楚知道你是知道我是因為看歌星而來的
但我一個小小市民有機會去你家玩嗎﹖
不過這真的使我覺得非常溫暖
原來巨星可以是那麼親民的

你的離去
我覺得很sad
當我在聽你最後現唱會的CD時
我真的哭了
原來你真的可以在這麼嚴重的情況下
去完成你的工作
還要做得那麼漂亮
我相信當時你是知道自己將會命不久矣
但仍然出盡全力去娛樂我們
但我們可以為你做甚麼呢
甚麼都做不到
祗可以在特別新聞中聽到你離去的消息
我能不sad嗎﹖

在你眾多流行好聽的歌之中
我特別鍾意赤的疑惑
原來是你第一首得獎歌
在這裡特別附上這歌歌詞
當作是對你的一種思念

* * * * * * * * * * * * *

赤的疑惑

曲：都倉俊一 | 詞：鄭國江 | 編：黎小田

讓快樂 為我展開
和你共聚 原是可愛
為我盡力 鍍上光彩
無奈惡運難以因你改

逝去舊夢 願你拋開
懷緬舊事 徒令感慨
求求你 讓我躲開
明知跟我沒將來

當飛花要片片飛 別離時刻真的不會改
盼艷陽常為你照 就如還回全部愛

多少淚 多少歡樂 化作無盡愛
默默回味過去情意 一一收起關進心坎內

今天美景不能再 不要為我添愁哀
似夕陽在散餘暉 將消失在可見未來

日本餐+ ST. PAUL

好開心呀
終於可以download世上唯一的花個ringtone喇﹗﹗

頭先睇壹週刊
話香港d日本菜唔正宗
有好多日本地道食物同0係日本食0既差好遠
其實我一直都覺得日本菜係應該細細碟
個樣好精緻
又或者好靚好得意
唔應該係會0係任食同自助餐度見到囉
0係任食同0係自助餐食到日本菜我會有好怪0既感覺
反而唔會食得好enjoy
再加上0果度祗有三文魚呢d超級普通0既魚生
一d都唔似食緊日本菜

其實我上一次去日本都唔係食0左好多餐日本菜
由其是頭幾日0係關西
食三文治同西式0野仲多
下次再有機會去日本一定要試d好正宗好正宗0既日本菜至得

尋日見無聊去0左SPSS個official site
好電腦化囉
最衰無d教師相
如果唔係可以睇0下仲有幾多個係我識0既
不過都見到有d 0野係無乜點變0既
例如上integrated science個lab啦
連教0既都仍然係Mrs. B. Cheung
又例如個家政廚房啦
都係可以一眼就認得出
其實好想返去小學睇0下0架
我諗我識0果d老師都無乜幾多個仲0係度教喇
成二十年前
就算0果陣時佢地三十幾四十
而家都成六十啦
都到退休年齡咯

有個人

有個人

曲：Eric Kwok | 詞：陳少琪 | 編：黃艾倫/李浩倫/杜自持

上個世紀 像已籌備 然後這生分享趣味
換了角色 換了場地 都等待你
若要說出 什麼是你 談話思想都可細味
明瞭內心 如同自已寫我人生 精彩傳記

同行共創造時勢 相識一天算起
我敢擋起各樣危機 有背後人是你
同行共領會人世道理 假使一天不再飛
到公園內散步年紀 有結伴人是你

若到某天 尚可合照 頭上多稀疏都美妙
肥胖或者 眉毛漸少 一切外表 都不重要
同行共創造時勢運氣 相識一天算起
我敢擋起各樣危機 有背後人是你

同行共領會人世道理 假使一天不再飛
有新相識我便提起 有個內人是你
同行共創造時勢運氣 相識一天算起
我敢擔起各樣危機 有背後人是你

同行共領會人世道理 假使一天不再飛
到公園中散步個紀 有老伴仍是你

* * * * * * * * * * * * *

另外一首我會聽到喊0既歌
因為實在太感動喇
我記得我第一次聽呢首歌而喊0既時候係0係Air Canada Centre睇張學友0既演唱會
當學友唱呢首歌0既時候
配合歌詞
個螢幕播出佢同埋羅美薇0係佢地唔同年紀﹑唔同階段0既相
當影到佢地兩個拍拖
甚至係白頭到老(卡通動畫)0既時候
我真係有鼻酸酸
要喊出0黎0既感覺
因為我覺得佢地真係一對好令人羨慕
好幸福0既一對couple呀

Shall we talk

Shall we talk

曲：陳輝陽 | 詞：林夕 | 編：金培達

明月光 為何又照地堂
寧願在公園躲藏 不想喝湯

任由目光 留在漫畫一角
為何望母親一眼就如罰留堂

孩童只盼望歡樂 大人只知道寄望
為何都不大懂得努力體恤對方
大門外有蟋蟀 迴響卻如同幻覺
SHALL WE TALK SHALL WE TALK
就當重新手拖手去上學堂

陪我講 陪我講出我們最後何以生疏
誰怕講 誰可悲得過孤獨探戈
難得 可以同座
何以 要忌諱赤裸
如果心聲真有療效
誰怕暴露更多 你別怕我

屏幕發光 無論什麼都看
情人在分手邊緣 只敢喝湯
若沉默似金 還談什麼戀愛
寧願在發聲機器面前笑著忙

成人只寄望收穫 情人只聽見承諾
為何都不大懂得努力珍惜對方
螳螂面對蟋蟀 迴響也如同幻覺
SHALL WE TALK SHALL WE TALK
就算牙關開始打震 別說謊

陪我講 陪我講出我們最後何以生疏
誰怕講 誰可悲得過孤獨探戈
難得 可以同座
何以 要忌諱赤裸
如果心聲真有療效 誰怕暴露更多

陪我講 陪我親身正視眼淚誰跌得多
無法講 除非彼此已失去了能力觸摸
鈴聲 可以寧靜
難過 卻避不過
如果沉默太沉重 別要輕輕帶過

明月光 為何未照地堂
孩兒在公司很忙 不需喝湯
SHALL WE TALK
斜陽白趕一趟
沉默令我聽得見葉兒聲聲降

* * * * * * * * * * * * *

好正0既一首歌詞
第一次
甚至頭幾次聽0既時候真係覺得好感動
甚至係喊0左出0黎
連去唱K我都會避開呢首歌唔唱
因為佢真係唱出0左我0既心聲

溝通真係好緊要
所謂溝通
係指兩個或以上0既人有0野講
你同我講0野0既時候我有反應
同樣地
我同你講0野0既時候你都要有回應
唔係祗係得一方面0係度講
而另一方面就唔瞅唔睬
甚至無視對方所講0既0野
不過
如果一開始都祗係得一方面講
或者就算雙方都有講但係仍然都唔能夠互相明白對方0既時候
0甘又可以點呢﹖

有時我會諗
講0野其實係可以令人互相了解
抑或會製造出更多0既誤會呢﹖

怪夢

呢幾晚訓得好差
晚晚都發埋d古靈精怪﹑莫明其妙0既夢
好辛苦囉
好似成晚無訓過0甘
起身個頭好痛好辛苦呀

~JAPAN~

好鐘意日本呢個地方
當然好大程度係俾日劇影響
好似係一個好fantasy
好唔真實0既地方

差不多全部朋友都知道我鐘意去日本
鍾意食日本0野
好多人都叫我搬去日本住
其實我好清楚知道我鐘意去日本旅行
但唔係鐘意住0係0果度
如果要住0既話
我寧願留番0係呢度
住同旅行真係好唔同
如果住0係日本0既話
又要憂柴憂米
生活指數又高
樣樣物價都0甘貴
打份工都唔知道夠邊樣開支
雖然好多日本人好有禮貌
但係當自己係一個citizen而唔係一個遊客0既話
所有睇0野0既角度就會有好大0既轉變
睇到0既好可能祗會係唔好0既方面
唔會有enjoy個感覺
再加上自己根本唔係一個日本人
0係日本呢個排外0既國家
我覺得要0係0果度討生活其實係好難囉
所以我覺得如果係住0既話
邊一個國家邊一個城市其實分別唔大
可以講係一樣
祗要唔好太落後就已經OK

去旅行0既理由係咩呢﹖
對我0黎講
其中一個好大0既原因係relax
將一切壓力呀﹑煩惱同唔開心0既事全部拋開
如果去一個自己喜歡0既國家或地方
當然開心0既程度會增加啦。

我記得0係1999年同爹0地媽咪經夏威夷返香港0既時候
本來要0係日本轉機
但係0甘0岩0果日香港打十號風球
所以被逼0係日本停0左一晚
可能因為係日本
我不但無擔心任何問題(因為要自己0係機場去每一個航空公司搵機票)
仲覺得好開心0添呀
0果時0係我個心裡面
唔係諗住點樣去搵機票返香港
而係諗緊0果日係禮拜幾
會有d乜0野電視節目睇
我仲記得0果日係禮拜四
我仲諗最衰唔係禮拜一啦
如果唔係就可以睇到SMAPXSMAP嘛
其實當時我真係乜都唔驚
來來回回0係成田機場度走0黎走去
最終真係皇天不負有心人0架
0係由一個terminal搭車去另外一個terminal 0既時候
我諗住問0下個JAL 0既空中小姐個terminal仲有幾耐至到
講0下講0下呢個空中小姐仲帶埋我地去JAL個counter
0甘我地就係0甘就搵到機票返香港
而且仲係搭出0左名貴0既JAL 0添
0係0果晚我真係好surprise 0架
有免費日本晚飯食
住間酒店雖然係細d舊d
但係不得不承認個環境好好
而且0果晚又可以0係不同0既節目入面睇到SMAP
都好開心0架
又有免費早餐
係自助0既
我0果時睇0左好多BISTRO
見d日本人好鍾意食納豆
所以我就覺得應該會好好食啦
點知...
係好超級極之難食同埋好臭囉
仲有呀
當架機到香港
我地要落機0既時候
我仲同個空中小姐講さようなら 0添呀
佢亦有同番我講さようなら呀
不過有一樣0野我好肯定0既
就係如果0果個地方唔係日本0既話
我係唔會乜都唔驚同埋0甘開心0甘enjoy囉

Long Vacation

一套自己好鐘意好鐘意0既日劇
無論演員﹑場景﹑配樂都好吸引0既劇
我自己睇過好多好多次喇
劇同小說都睇過好多次
多到都數唔到有幾多
多到可以知道邊一場可以0係邊一集度搵到

其實呢套劇真係好唔現實
唔現實到我都唔敢相信呢個世界上可以有呢d情況出現
所以好適合0係想逃避現實0既時候睇
好想好想住0係瀨名0果間屋呀
個view好正
對住條河
前面又無遮無擋
條馬路又唔見有太多車
好靜中帶旺囉。
層數少﹐單位少﹐又好似無乜閒雜人等
得閒又可以上天台望星﹐真係好perfect。

桃子講過
我地成日要0係人面前要表現得好成熟
一個大人0既模樣
但係內心祗係一個小女孩
就好似一個幾歲大0既細路女著住對高跟鞋扮大人0甘好唔自然
真係好到肉
我成日都覺得自己好唔適合長大
好似越來越唔識點樣去做人
將來係點當然無人會知
但係就係因為呢d未知數令到我好無安全感

套劇最後當然係happy ending
但係現實有0甘完美咩﹖
瀨名講過
如果遇到唔如意0既事或者自己走到一個瓶頸0既位置
可以唔好去諗0甘多
放鬆d
就當係個天俾0既一個假期
到時可能會有意想不到0既結果
講得好完美呀
但係係咪真係會0甘完美呢﹖

誕生日

今年生日又係有3個蛋糕
全部都係Tiramisu
好開心呀
不過會好肥呀
希望唔好再肥落去喇

慶祝20代最後一個生日

尋日同d朋友慶祝0左我0既20代最後一個生日
本來諗住去ECHO場K
點知full晒
早知訂定位啦
又無諗過會爆得0甘犀利囉
以為可以去間新0既試0下
不過都OK啦
我把聲都唱唔到啦
之後走去TAKE ONE
又爆埋
最後去0左J-TOWN睇0野
其實都無咩好睇0既
不過總好過唔知做乜先啦
其實係想買本雜誌睇0下0既
不過又好似無乜特別
如果有SMAP做封面0既我會買0架
無去J-TOWN好耐喇
以前有返日文放0左學都會去睇0下0野
食個晏
其實係想睇0下會播d咩電視節目0者
有次撞0岩播 SMAPXSMAP
開心到我死呀
而家個J-TOWN變0左好多咯
又擴充0左
其實係應該多0左0野賣0既
但係硬係便得以前個感覺好d

都好0既
尋日天氣又唔錯
陽光普照
又唔算太凍
悠悠閒閒
去0下J-TOWN咪當去0左一轉日本囉
夜晚食日本0野
都OK啦
雖然都係魚生同天婦羅
無乜特別

學Long Vacation同Gift話齋
咪當係個天送俾我0既一份生日禮物囉
都唔錯0架喇
前日同今日都唔係0甘好天

20代0既最後一個生日
感覺都無乜點0者
不過個心就好似有d戚戚然囉
唔知點0甘
之前睇番“ドク”0既小說
長瀨老師就係因為自己已經29歲(其實係就快30歲)
做緊0既OL工又好似無乜前途0甘
所以決定去做日語教師
其實我都有差唔多0既感覺
可能已經到0左同長瀨老師差唔多0既年紀
真係覺得份工好似好刻板0甘
無乜好大前途0甘
又唔係話份工唔好0既
不過就係機械性0左d囉

尋日睇雜誌
原來已經係SARS一週年喇
真係唔經唔覺呀
我仲記得上年又係慶祝生日0果日聽到呢度有SARS 0既新聞

懷念銅鑼灣

唔知點解
每次去J-TOWN
都覺得好似返番去細個80年代初0既年代
可能0果陣時日本百貨公司剛剛0係銅鑼灣登陸
每次去日本百貨公司就好開心
因為可以見到好多好得意0既文具
又可以食到日本魚型紅豆餅
好似比普通0既公司高級d
聽Twins 0既“下一站天后”都俾到我有同樣0既感覺﹕

* * * * * * *

站在大丸前 細心看看我的路

再下個車站 到天后當然最好

在時代的廣場 誰都總會有獎

在百德新街的愛侶 面上有種顧盼自豪

* * * * * * *

好懷念以前0係銅鑼灣0既日子呀
呢d感覺就算而家再返香港都感受唔到0架喇
因為松阪屋已經無0左
大丸已經唔再係大丸
SOGO亦都已經唔似以前0既SOGO
三越就好似得番個殼0甘
而0果一帶0既地區已經無0左0果種日式0既感覺
已經變得好香港風喇

怪人一個

記得呀何超儀講過
話其他好多人覺得佢諗0野好怪
但係其實佢覺得其他人諗0野先至係怪
我都好有同感
我唔知其他人點諗我
不過我真係覺得其他人諗0野有d怪
就好似原來開OT唔係因為自己多0野做
做唔切
要OT做埋d0野
而係老闆有錢俾番
而放工無乜特別0野做
所以就開OT
唔﹐呢個原因幾創新丫
我放0左工有無0野做
原來同開OT有0甘大0既關係
乜原來放0左工唔可以無0野做0架咩﹖
一定要做0野做到夜一夜
0甘先至叫做充實﹖
我無話過唔開OT 0者
有需要0既話我一定會開
不過準時放工又唔係罪0黎0架0者
有咩0甘怪﹖
我唔否認我而家呢份工都幾舒服
但係又如何呢﹖
唔通要捱到金睛火眼先至叫做正常咩﹖

仲有
原來講對唔住祗係知道自己有d 0野做0左而令人地覺得嬲同唔開心
或者都知道自己有唔0岩0既
不過錯照認
認完照犯0甘0者
好假囉
0甘即係點呢﹖
原來我祗要話“唔緊要”就可以當乜事都無發生過
完全唔會去改囉
0甘講對唔住0既意義係咩呢﹖
每一次我都講“唔緊要”
我真係覺得好好笑
好笑到我講0既時候我都差d笑0左出0黎
唔通要我發晒火先至得﹖
點解有d人真係可以0甘假﹖﹖﹖
0甘都可以做得出0既﹖
抑或我小題大做0左d呢﹖

大病初癒

終於禮拜五啦
呢兩個禮拜好辛苦
真係渡日如年呀
病了成個禮拜
發燒都發了成五日
食又食唔落
好似d食物一掂到個胃就想嘔番出0黎
好難頂囉

前日開始返番工
但係可能係d藥0既關係啦
0係公司個頭成日wing wing地
好暈好眼訓囉
不過我一諗起梅姐連生緊cancer都可以開八場演唱會(仲有其他大大小小0既工作同訪問)
都應付得好好
就覺得自己呢d感冒發燒係小兒科
應該捱得到0既

講開又講
梅姐個concert DVD仲未出
真係等得好心急呀
聽講話要加d嘉賓片段落去
但d嘉賓0既唱片公司又遲遲唔覆
好心就快d啦
呢d係造福人群嘛
唔經唔覺
梅姐唔0係度差不多三個月喇
而哥哥就差不多一年喇
呢一年過得好快呀
我仲記得當日我知道呢個消息0既時候0既心情
人地話佢地會0係另一個世界重聚
但係我就覺得病死0既同自殺死0既可能會去唔同0既地方
話晒一個係唔自願
一個係主動結束生命啦
不過諗起梅姐0既祭品又有舞台又成隊band
好似死了都要繼續唱
繼續去娛樂人地
唔知梅姐願唔願意啦
不過我就覺得好悲好淒涼囉
死了都仲要做
好辛苦囉

今朝聽電台話今年日本d櫻花早開
好似下個禮拜就開始開喇
唉﹐今年又miss了
又估唔到會早開呀
乜今年好暖咩﹖
呢度今年都幾凍呀
又多雪
希望春天同夏天快d到啦
冬天好辛苦呀。

日劇中毒

最近又瘋狂地睇了幾套日劇
話就話用0黎練習listening準備考日本語文檢定
當然實際係自己想睇啦
令我最印象深刻0既當然係“白色巨塔”
真係不愧係用0黎做富士電視台開局45周年0既大型制作
劇本故事好不在話下
連演員都一級捧
特別係唐澤壽明
之前祗係知道佢係山口智子個老公
但估唔到佢d戲係0甘掂
真係好有戲味
睇呢d演員做戲先至叫做享受呀
而家超期待第二部0既VCD
希望可以快D出啦
套劇下個禮拜就0係日本大結局喇

講開日本語文檢定
好開心呀
估唔到有成81%
真係好意外
雖然祗係第三級
離流利日文仲有一大截距離
但我已經好興奮啦
之前原本諗住用呢個試來做一個指標
睇0下再應唔應該讀上去
而家知道成績唔錯
都有D心思思再讀上去
最好就係可以去日本讀啦
0係呢度讀好似好難有所進步囉

寫日記

曾幾何時
寫日記對我來講係天荒夜談
番中學其中一樣最唔鍾意做0既就係寫雙週記
乜寫日記呢d私人事都叫做功課?
仲要係唔寫唔得
我覺得個concept真係好有問題
做學生0既唔係番學就放學啦
有咩好寫﹖
自細就已經知道睇其他人0既日記係不道德(如果人地俾我睇就唔同)
但偏偏自己要每兩個禮拜作0的0野出來交功課
好似夾硬除晒d衫比人睇
真係好荒謬

但人大了
覺得寫容易表達過講
可能已經習慣用email溝通
又或者我表達能力差啦
講0野一舊舊
句0野未講完個腦就已經一片空白
之前貪玩寫過幾篇文章去明報
多數都有登出來
都幾開心0架
不過之後又懶啦
兼且呢d真係要講mood
所以都有幾年無寫喇